Kreta Bovo

Minoo, la reĝo de Kreto, preĝis al Posejdono sendi al li bovon, por ke li povu honori kaj oferi al la maradio. Posejdono respondis la preĝon de la reĝo sendante belan blankan bovon el la maro. Tamen Minoo rompis sian vorton al la dio, rifuzante oferi la belan bovon al Posejdono.

Kio estis speciala pri la Kreta Bovo estis ĝia kapablo marŝi sur la akvosurfaco.

Posejdono punis Minoon igante la edzinon de la reĝo Pasifaon (Pasiphae), la filinon de la sunodio Helio, enamiĝi al la bovo. Pasifao kunigis sin kun la Kreta Bovo, kaj naskis monstran idon nomitan Minotauro. La Minotauro havis la korpon de viro sed la kapon de bovo. Minoo enprizonigis la monstron en la Labirinto.

Poste Heraklo devis plenumi sian sepan laboron, kiu estis preni la Kretan Bovon por sia kuzo Eŭristeo. Minoo, kiu hontis pri la okazaĵo kun sia edzino kaj la bovo, estis fervora doni la bovon al Heraklo. Heraklo alportis la bovon al Grekio rajdante sur ĝia dorso dum ĝi naĝis al Tirinto.

Post kiam tiu tasko estis kompletigita, Heraklo liberigis la bovon en la landon, kaj ĝi vagis ĝis ĝi alvenis al la ebenaĵo de Maratono en Atiko. Poste la bovo estis renomita al la Maratona Bovo.

Egeo, la reĝo de Ateno, sendis Androgeon, la filon de Minoo, alfronti la bovon, kaj li estis mortigita. Lia morto estis la fonto de la milito inter Kreto kaj Ateno. Gajninte la militon, Minoo devigis Egeon pagi tributon ĉiun naŭan jaron. Minoo postulis sep junulojn kaj sep knabinojn kiel tributon. La atenaj junuloj kaj knabinoj estis lasitaj en la Labirinto por nutri lian monstron, la Minotauron, idon de la Kreta (Maratona) Bovo.

Post kiam Tezeo fariĝis reĝo, la heroo decidis forigi la bovon, kiu ankoraŭ ruinigis la ebenaĵon de Maratono. Tezeo mortigis la Maratonan Bovon.