Arawn

Arawn estis la Sinjoro de Annwfn (la Alia Mondo) en la Unua Branĉo de la Mabinogi – Pwyll, Sinjoro de Dyved (Mabinogion). Arawn amikiĝis kun Pwyll kiam ili renkontis unu la alian en la arbaroj. Arawn proponis al Pwyll preni lian lokon kiel Sinjoro de Annwfn dum unu jaro kaj unu tago. Pwyll estus transformita por aspekti kiel Arawn, tiel ke Pwyll povu batali kontraŭ Havgtan (Hafgan) en lia loko. Havgtan estis ankaŭ Sinjoro de Annwfn kaj la ĉefmalamiko de Arawn. Havgtan povis esti mortigita nur per unu bato, ĉar la dua bato magie resanigus Havgtan. Do Pwyll morte vundis Havgtan kaj rifuzis fari alian baton, tiel la malamiko de Arawn mortis.

Arawn havis belan edzinon kiu estis sennoma. Dum Pwyll ŝajnigis esti ŝia sinjoro kaj edzo, Pwyll ne profitis de tio kaj ne amindumis la edzinon de Arawn. Arawn estis tiel surprizita ke Pwyll protektis la ĉastecon de lia edzino, ke ili fariĝis amikoj kaj aliancanoj. Arawn riĉe rekompencis Pwyll pro ambaŭ faroj. Oni kredas ke Arawn sendis Rhiannon-on por fariĝi la edzino de Pwyll.

Arawn ankaŭ donis porkojn al Pryderi, la filo de Pwyll, kiam Pryderi fariĝis Sinjoro de Dyved. Tiuj porkoj estis ŝtelitaj de Gwydyon (Gwydion) en la Kvara Branĉo de la Mabinogi – Math, Filo de Mathonwy. Tio kondukis al milito inter Dyved kaj Gwynedd, kie Pryderi estis mortigita en unuopa kombato kontraŭ Gwydyon, la nevo de Reĝo Math de Gwynedd.

Pri Arawn estis ankaŭ dirite ke li posedis la magian kaldronon, kiun Arturo provis ŝteli en la obskura poemo en la Libro de Taliesin nomata Rabaĵoj de Annwfn (Preiddiau Annwfn).