Sigurd

En la norsaj legendoj Sigurd estis la filo de Sigmund kaj Hjordis, kiu estis la filino de Eylimi. Li estis la duonfrato de Sinfjotli, Helgi kaj Hamund.

Notu, ke en la Thiðrekssaga (norvega sagao) la patrino de Sigurd estis Sisibe, filino de Nidung, la reĝo de Hispanio. En la Nibelungenlied (germana eposo) li nomiĝis Siegfried, kaj liaj gepatroj estis reĝo Siegmund de Nederlando kaj Sieglind.

Sigurd estis la portanto de la reforĝita magia glavo de sia patro nomita Gram (Fafnira Puno aŭ en germana Balmung). Odino helpis la junan heroon elekti sian lojalan kaj sentiman ĉevalon nomitan Grani, idaro de Sleipnir, la magia ĉevalo de Odino. Post mortigi la drakon Fafnir kaj sian flegpatron Regin, Sigurd posedis la trezoron kaj malbenitan ringon de Andvari, nomitan Andvaranaut. La trezoro kaj ringo fariĝis unu el la faktoroj de la falo de Sigurd. Li ankaŭ povis kompreni la lingvon de la bestoj (birdoj) kaj havis nevenkeblan forton kaj kuraĝon post manĝi la koron de Fafnir.

Sigurd enamiĝis al la Valkirio Brynhild, rajdante al Hindarfell, kie li vekis Brynhild kaj serĉis ŝian konsilon. Sigurd promesis edziĝi al ŝi. De Brynhild li estis la patro de filino nomita Aslaug. Tamen Sigurd falis sub la sorĉon de Grimhild, patrino de reĝo Gunnar de Burgundio. Sigurd forgesis pri Brynhild kaj edziĝis al la fratino de Gunnar, Gudrun. Gudrun naskis al la heroo filinon nomitan Svanhild (Swanhild) kaj filon nomitan Sigmund (Sigmund Sigurdarson), nomitan laŭ la patro de Sigurd. Sigurd fariĝis la sangfrato de Gunnar kaj Hogni, kaj helpis la reĝon gajni multajn el siaj militoj.

Sigurd helpis sian bofraton gajni Brynhild per rajdi tra la Ringo de Fajro, alivestita per la sorĉo de Grimhild kiel Gunnar. Sigurd nur rekonis Brynhild kiam ŝi jam edziĝis al Gunnar. Kiam Brynhild malkovris, ke Sigurd kaj Gunnar trompis ŝin en geedzeco kun Gunnar, ŝi planis la morton de la heroo. Ŝi konvinkis sian edzon Gunnar per mensogoj, ke Sigurd malhonoris sian ĵuron al li kaj misuzis ŝin dum ilia vojaĝo al Burgundio.

Guttorm, la frato de Gudrun kaj Gunnar, mortige vundis Sigurdon. Gunnar kaj Hogni ankaŭ mortigis Sigmundon, la filon de Sigurd, laŭ ordono de Brynhild. Ĉe sia morto Brynhild malkaŝis la veron al Gunnar, ke ŝi mensogis pri la honoro de Sigurd, antaŭ ol ŝi mortigis sin. Sigurd kaj Brynhild estis kremaciitaj kune sur unu sola brulŝtiparo.

Laŭ la Volsungasaga kaj Thidrekssaga, li portis ŝildon kun ruĝ-ora enkrusto, kaj drakon prezentitan malhelbruna sur la supro sed helruĝa sur la malsupro. Lia ekipaĵo (kasko, standardo kaj surtuto) havis la saman koloron kaj markojn.