Cailitin

Cailitín Dána (Cailitin aŭ Calatin) estis la ĉefdruido de Medb kaj Ailill. Cailitin estis plej konata pro sia batalo kontraŭ la heroo de Ulsterio Cu Chulainn, en la Táin Bó Cuailnge.

Cailitin havis multajn filojn kaj plurajn filinojn, kaj ili ĉiuj estis konataj kiel la Klano Cailitin. Ili ĉiuj estis priskribitaj kiel terure deformitaj druidoj.

Dudek sep filoj aliĝis al Cailitín kiam ili transiris en Ulsterion kun la granda armeo de Medb. Ĵus antaŭ la unuopa kombato inter Cu Chulainn kaj Fer Díad Mac Damann, Cailitin kaj liaj filoj batalis maljustan kombaton kontraŭ la ulstera heroo. Fakte, 29 el ili batalis kontraŭ Cu Chulainn, kaj unu el ili estis nomata Glas Mac Delga, kiu estis aŭ la nepo aŭ la nevo de Cailitin (filo de la fratino).

La Klano Cailitin svingis 29 venenopintajn lancojn; se la viktimo ne estis mortigita tuj, li mortus pro la veneno post naŭ tagoj da agonio. Cu Chulainn kaptis ĉiujn 29 lancojn per sia ŝildo, sed ilia supera nombro estus mortiginta la heroon, se ne unu el la ekzilitaj ulsteranoj, Fiachu Mac Fir Fhebe, estus veninta al lia helpo. Per unu glavo-frapo, Fiachu fortranĉis la dekstrajn brakojn de la Klano Cailitin. Cu Chulainn mortigis la tutan Klanon Cailitin, kvankam Glas sukcesis momente eskapi reen al la tendaro de Medb. Antaŭ ol Glas povis malkaŝi la perfidon de Fiachu, la nevo de Cailitin estis mortigita per ĵetŝtono de Cu Chulainn.

Malgraŭ la morto de Cailitin kaj liaj 27 filoj, la aliaj postvivantaj infanoj de Cailitin implikiĝis en la morto de Cu Chulainn. Ili uzis sian magion por forlogi la heroon for, denove solan, por alfronti la armeon de Medb.