Gernot

Gernot estis la dua filo de Dancrat kaj Uote. Gernot estis la kunreganto de Burgundio, dividante la regnon kun siaj fratoj Gunther kaj Giselher. Gernot estis ankaŭ la frato de Kriemhild. En la norvega eposo Thiðrekssaga li estis nomita Gernoz.

Gernot kaj liaj fratoj amikiĝis kun Siegfried kiam li venis al ilia regno. Post la milito kontraŭ la Saksoj, estis Gernot, kiu konsilis al Gunther, ke edziĝo inter Siegfried kaj ilia fratino utilus al ilia prestiĝo kaj regno.

Gernot kaj Giselher protestis kontraŭ la komploto de Hagen murdi Siegfried, sed ili faris nenion por averti la heroon. Post la funebro de Siegfried, kiel Gunther, Gernot ne protektis sian fratinon kontraŭ la maĥinacioj de Hagen, kiam Hagen ŝtelis la nibelungan trezoron.

Gernot aliĝis al siaj fratoj kaj Hagen por viziti Kriemhild en Hungario. Malgraŭ la aŭguro de pereo en la vizito, ili iris al Hungario, sciante, ke ilia fratino konspiras kontraŭ ili. Dum ilia haltejo en Pochlarn, Rudiger donis al Gernot grandiozan glavon kiel donacon antaŭ ol ili daŭrigis sian vojaĝon al Hungario.

Gernot kaj liaj fratoj provis malsukcese fini la bataladon inter Hagen kaj la hunaj militistoj, sed kiam ili vidis, ke la hunaj kavaliroj eble superfortos siajn militistojn, ili ekis savi Hagen kaj la Burgundojn.

Gernot kaj Rudiger mortigis unu la alian en la lasta tago de la batalado. Rudiger estis mortigita de la glavo, kiun li donis al Gernot kiel donacon antaŭ ilia foriro de Pochlarn al Hungario.