Naŭplio

Naŭplio estis marhaveno ĉe la Golfo de Argolido, fondita de Naŭplio.

Estas iom da konfuzo, ĉar ekzistas du Naŭplioj. Naŭplio estis la filo de Posejdono kaj Amimono, la filino de Reĝo Danao de Argoso. Naŭplio estis granda maristo, kaj li estis konata kiel Naŭplio la Navigisto. Naŭplio ne nur estis la reĝo de Naŭplio; li estis ankaŭ pirato konata pro praktikado de sklaveco, precipe forrabado kaj vendado de princinoj al aliaj reĝoj.

Unu sklavino estis Aŭgo, la filino de Reĝo Aleo de Tegeo. Aleo malkovris, ke Aŭgo gravediĝis kiam Heraklo restis en Tegeo (dum la milito kontraŭ Aŭgejaso de Eliso aŭ Hipokoonto de Sparto), do Aleo ordonis al Naŭplio vendi lian filinon. Naŭplio vendis Aŭgon al Teŭtras, la reĝo de Mizio kaj fondinto de Teŭtranio. Feliĉe por la princino, Teŭtras enamiĝis al Aŭgo, do li edziĝis al ŝi. Aŭgo fariĝis la patrino de Telefo, kiu gvidis la grekan ŝiparon al Trojo dum la Troja Milito.

Laŭ Apolodoro, Naŭplio estis edziĝinta al Klimeno, la filino de Krateo de Kreto, la filo de Minoo kaj Pasifao. Kaj li estis la patro de Palamedo, Oiakso kaj Naŭsimedono. Palamedo helpis Agamemnonon rekruti Odiseon por la armeo dum la Troja Milito. Palamedo malkovris la ruzon de Odiseo (ŝajnigante frenezon), minacante la morton de la bebo Telemako, filo de Odiseo. Odiseo venĝis sin plantante trojan oron en la tendo de Palamedo kaj falsan leteron de Reĝo Priamo de Trojo. Palamedo estis kondamnita kiel perfidulo kaj mortigita per ŝtonoj. Vidu Konskripto kaj la Alveno en Trojon en la Troja Milito.

Naŭplio siavice venĝis sin kontraŭ pluraj grekaj gvidantoj kiuj revenis hejmen de Trojo. Naŭplio sukcesis igi la edzinojn de Agamemnono, Diomedo kaj Idomeneo de Kreto preni amantojn dum la foresto de siaj edzoj. La amanto de Klitajmnestro, Egisto, murdis Agamemnonon. La amantoj pelis Diomedon kaj Idomeneon en ekzilon.

Dum ŝtormo proksime de la bordo de Eŭbeo, la greka ŝiparo kredis ke ili estas proksime de haveno, ĉar Naŭplio starigis falsan lumturo-signalon. La ŝipoj frakasiĝis kontraŭ la rokoj kaj multaj dronis. Pro tio Naŭplio estis konata kiel la Detruanto de Ŝipoj.

Ekzistis ankaŭ la argonauto Naŭplio kiu velis kun Jazono sur la Argo. Laŭ Apolonio de Rodo, la argonauto Naŭplio estis la filo de Klitoneo, kaj la pra-pra-pranepo de la fondinto de Naŭplio (Naŭplio la 1-a). Li plej verŝajne estis la patro de Palamedo kaj la Detruanto de Ŝipoj, ĉar li vivis pli proksime al la tempo de la Troja Milito, dum Naŭplio la 1-a naskiĝis plurajn generaciojn antaŭ Akrisio.