The Dream of Rhonabwy

Kiel Culhwch kaj Olwen, la Sonĝo de Rhonabwy estis sendependa rakonto pri Arturo kiu havis nenian influon de ekster Kimrio.

Madawg, la filo de Maredudd, regis Powys, nordan regnon en Kimrio. Lia frato Iorwerth estis afliktita kaj enviis la povon de sia frato, tamen rifuzis akcepti ajnan oficon kaj honoron de sia frato. Iorwerth prenis siajn armitajn sekvantojn en serio da rabiraj kampanjoj tra Anglio. Madawg sendis virojn por trovi sian fraton.

En Didlystwn, malgranda urbeto en Rhychdir, grupo de la viroj de Madawg serĉis ŝirmon ĉe la domo de Heilyn la Ruĝa, la filo de Cadwgawn filo de Iddon. Ĉi tiuj viroj estis Rhonabwy, Kynwrig la Ruĝa Lentuga el Mawddwy, kaj Cadwgawn la Dikulo el Moelvre en Kynlleith.

La domo de Heilyn la Ruĝa estis kaduka kaj malpura. La fama kelta gastamo ne evidentis, ĉar ilia gastiganto malvolonte bonvenigis siajn gastojn preskaŭ ĝis la grado de malĝentileco. Rhonabwy kaj liaj kunuloj manĝis senĝojan manĝon antaŭ ol retiriĝi por la nokto. Dum liaj du kunuloj dormis sur malkomforte malpuraj, puloplenaj matracetoj, Rhonabwy decidis dormi sur flava bovhaŭto sur platformo.

Post kiam Rhonabwy ekdormis, li sonĝis ke li transiras la ebenaĵon de Argyngrog kun siaj kunuloj kiam ili renkontis rajdiston en verda kaj flava vestaĵo, armitan per glavo. La rajdisto havis buklajn harojn kaj bone tonditan barbon, kaj rajdis sur flava ĉevalo. Kiam ili vidis lian mienadon, Rhonabwy kaj liaj kunuloj fuĝis pro timo, sed la stranga kaj timiga rajdisto preterpasis ilin. Ili petegis por kompato, kiun la rajdisto donis.

La nomo de la rajdisto estis Iddawg filo de Mynyo, sed li estis konata kiel Iddawg la Kirno de Britio. Li ricevis la nomon kiam li liveris mesaĝojn por Arturo al lia nevo Medrawd (Mordred) dum la Batalo de Camlann; anstataŭ ripeti la vortojn de Arturo en ĝentila kaj afabla maniero al Medrawd, Iddawg ripetis la mesaĝon en la plej malĝentila maniero ebla. Iddawg estis punita kaj devis fari penitencon ĉe Y Llech Las en Skotlando.

Iddawg agis kiel gvidisto por Rhonabwy kaj liaj kunuloj. Iddawg identigis por Rhonabwy aliajn rajdistojn en ekstravagancaj vestaĵoj kaj armitajn fortojn el diversaj regnoj kun koloraj uniformoj kaj strangaj standardoj. Inter la viroj kiujn ili renkontis en la stranga sonĝo de Rhonabwy estis Imperiestro Arturo. Arturo estis malĝoja ke Brition defendas malgrandulaj viroj, kiel Rhonabwy kaj liaj kunuloj. Kelkaj el la personoj kiujn Rhonabwy renkontis aŭ vidis, povis esti identigitaj kun kavaliroj en la ĉefa Artura legendo — kiel Kei kun Sinjoro Kay, la plej bela viro en Britio; Cadwr Grafo de Kornvalo kun Duko Cador de Kornvalo, la glavportanto de Arturo, kaj Owein filo de Uryen kun Sinjoro Yvain.

Arturo kaj liaj viroj prepariĝis por la Batalo de Baddon (Mons Badon), kontraŭ Osla Granda Tranĉilo. Tamen Arturo ŝajnis esti implikita en stranga renkontiĝo kun Owein. Owein konsentis ludi tabludon kun Arturo nomitan gwyddbwyll. Dum ili ludis gwyddbwyll, mesaĝisto en stranga armilaro kaj vestaĵo alvenis por Owein, dirante ke la pordistoj kaj paĝioj de Arturo batalas kaj mortigas la korvojn de Owein. Owein petis Arturon alvoki siajn virojn, sed Arturo nur respondis “Via vico.” Ili baldaŭ finus ludon de gwyddbwyll, kaj komencos novan ludon.

Ankoraŭ dufoje, du malsamaj mesaĝistoj liveris mesaĝon pri kiel la korvoj malmulte faris, Owein petus Arturon haltigis siajn virojn, sed Arturo nur donis la saman respondon al Owein — “Via vico.” — antaŭ komenci novan ludon. Kun la lasta mesaĝo, Owein diris al sia tria mesaĝisto levi standardon kie la batalado estas plej intensa.

La ondo de la stranga batalo inter la korvoj de Owein kaj la pordistoj kaj paĝioj de Arturo komencis turniĝi favore al Owein. Ĉi-foje, la korvoj gajnis: mortigante kaj turmentante la pordistojn kaj paĝiojn de Arturo. Ĉi-foje, mesaĝistoj venis por Arturo pri la novaĵo ke la korvoj venkas liajn virojn. Nun estis Arturo kiu petis Owein retiri siajn korvojn, kaj estis Owein kiu diris al sia gwyddbwyll-kontraŭulo: “Via vico, mia sinjoro.” Ili daŭrigis la ludon de gwyddbwyll.

Kun la tria mesaĝo de Arturo, la reĝo diris al Owein alvoki siajn korvojn, kaj Arturo finis la ludon premante la gwyddbwyll-orajn figurojn en polvon. Nur tiam Owein petis malaltigi sian standardon, finante la batalon inter la viroj kaj korvoj. Iddawg identigis la ses mesaĝistojn por Rhonabwy kiuj aperis dum la gwyddbwyll-ludoj.

Tiam Osla Granda Tranĉilo alvenis kun 24 kavaliroj, petante batalpaŭzon de Arturo. Arturo petis konsilon de siaj konsilantoj; inter ili estis Gwalchmei (Gawain) filo de Gwyar, Drystan (Tristan) filo de Tallwch, Howel (Hoel) filo de Emphyr el Bretonio, kaj aliaj militistoj trovataj en la rakontoj de Culhwch kaj Olwen. Arturo donis al Osla Granda Tranĉilo batalpaŭzon dum unu monato kaj duono.

Tiam Rhonabwy vekiĝis kaj eksciis ke li kaj liaj kunuloj dormis dum tri tagoj kaj tri noktoj.