Amfitrito

Maradiino. Amfitrito estis filino aŭ de Nereo kaj Doriso, aŭ de Oceano kaj Tetiso. En la romiaj mitoj Amfitrito estis konata kiel Salacia.

Posejdono persekutis ŝin, sed Amfitrito forkuris al la Titano Atlaso por protekto. Posejdono edziĝis al Amfitrito nur post kiam Delfino konvinkis ŝin. Kiel kunulino kaj edzino de Posejdono ŝi fariĝis la patrino de Tritono, Rodo, Albiono, Ĥaribdo kaj Bentesikime.

Kiel sia frato Zeŭso, Posejdono havis multajn amaferojn kun mortemaj virinoj kaj nimfoj. Sed male al Hera, la edzino de Zeŭso, Amfitrito ne estis ĵaluza kaj venĝema. Amfitrito ŝajnis bone interrilati kun la infanoj de Posejdono, precipe kun la atena heroo Tezeo.

Kiam Zeŭso sendis tondron kaj fulmon por pruvi, ke Minoo, reĝo de Kreto, estis la filo de Zeŭso, la reĝo ĵetis ormoneron en la maron kaj petis Tezeon preni la moneron, por pruvi, ke li estas la filo de Posejdono. Kiam Tezeo saltis en la maron por preni la moneron, Amfitrito ne nur donis la moneron al Tezeo, sed ankaŭ sian oran kronon kiel pruvon.