Cumhaill

Kapitano de la Fianna (rígfhéinnid) kaj ĉeftano de Klano Baiscne. Cumhaill (Cumhall aŭ Cool) estis la filo de Trenmor kaj posteulo de Baíscne. Cumhaill estis ankaŭ la frato de Crimmal.

Cumhaill edziĝis kun Muirenn, filino de Tadg kaj nepino de Nuada de la Arĝenta Mano. Cumhaill estis la patro de Finn.

Antaŭ la naskiĝo de lia filo, Goll Mac Morna defiis Cumhaill por la gvidado de la Fianna. La bopatro de Cumhaill kontraŭis la geedziĝon de sia filino kun Cumhaill. Tadg konspiris kun Goll por faligi kaj mortigi Cumhaill.

Klana milito estis batalita ĉe Cnucha (Knock), ne malproksime de Tara. Tadg uzis sian magion por konfuzi kaj timigi Klanon Baiscne. Cumhaill komencis suferi pro subita malforteco kaŭzita de la magio de Tadg. Cumhaill sukcesis vundi Goll, elprenante unu el liaj okuloj, sed Cumhaill estis mortigita de Lia, sinjoro de Luachar.