Ateno post Tezeo

Tezeo mortis en ekzilo, lasante Menesteon (Μενεσθεύς) regi Atenon. En la Iliado Menesteo estis listigita kiel svatanto de Heleno, kaj li fariĝis la komandanto de la atena floto de kvindek ŝipoj dum la Troja milito. Kelkaj diris, ke Menesteo mortis ĉe Trojo aŭ alie migris al la insulo Meloso, kie li fariĝis reĝo. En ambaŭ kazoj la filo de Tezeo rekaptis la regnon.

Tezeo havis du filojn, Akamason (Ἀκάμας) kaj Demofonon (Δημοφών), de Fedro. Ili loĝis en Eŭbeo dum la regado de Menesteo. Ili akompanis Elefenoron (Ἐλεφήνωρ, ilia kuzo?), la reĝon de la Abantoj de Eŭbeo, kiu alportis kvardek ŝipojn al Trojo. Post la milito Demofono kaj Akamas revenis al Ateno, rekaptante la tronon. Demofono fariĝis reĝo.

Estis dum la regado de Demofono, ke Eŭristeo persekutis la filojn de Heraklo (Heraklidoj) kaj Iolaon. Ĉar Tezeo kaj Heraklo estis kuzoj, tiel ankaŭ Demofono kaj la Heraklidoj. Demofono pensis, ke estas lia devo protekti la malfortajn, kiel lia patro faris. Ateno estis la sola regno, kiu akceptus la Heraklidojn kiel rifuĝintojn. Sekvis lukto, en kiu la atenanoj venkis Eŭristeon kaj lian armeon.

Laŭ alia versio rakontita de Apolodoro, Demofono neniam atingis Atenon post la milito en Trojo; tial li neniam fariĝis reĝo. Li surterigis sian malgrandan floton en la lando de la trakiaj Bisaltianoj. La filino de la reĝo, Filiso, enamiĝis al Demofono, do la reĝo ofertis al li sian filinon kaj sian regnon, sed Demofono volis reveni hejmen. Demofono promesis reveni al ŝi post fiksita tempo. Li lasis Filison ĉe Naŭ Vojoj (Amfipolis), kiu donis al li skatolon enhavantan artefakton sanktan al la patrina diino Reo. Filiso diris al li ne malfermi la skatolon, krom se li ne povus reveni al ŝi en la fiksita tempo.

Demofono forvelis, ne al Ateno, sed al Kipro, kie li restis. Post kiam la fiksita tempo pasis, ŝi sciis, ke Demofono trompis kaj perfidis ŝin. Filiso kuris al la bordo naŭ fojojn (la kialo, kial Amfipolis nomiĝis Naŭ Vojoj), kie Filiso freneze malbenis la malfidelan fianĉon kaj mortigis sin. Verŝajne samtempe kun ŝia morto Demofono malfermis la skatolon kaj estis frapita de frenezo. Li rajdis freneze sur sia ĉevalo, ĝis la ĉevalo mortis pro elĉerpiĝo. Demofono estis ĵetita de la ĉevalo kaj falis sur sian propran glavon.

La posteuloj de Tezeo regis Atenon kaj Atikon ĝis la alveno de la Ionianoj, la posteuloj de Iono, dum la dora invado.