Konkurso de saĝo kun Vafthrudnir
La dialogo en Vafþrúðnismál («Dirajoj de Vafthrudnir») komenciĝas per Odino diranta al sia edzino Frigg, ke li vizitos la giganton Vafthrudnir, kiu estis reputata la plej saĝa el la gigantoj. Frigg preferus, ke Odino restu hejme, prefere ol alfronti tiel potenca giganton, sed ŝi ne malinstigis lin.
Odino alvenis al la halo de Vafthrudnir alivestita kiel homa vaganto. Odino prezentis sin kiel Gagnrad, serĉante la saĝon de Vafthrudnir. Vafthrudnir avertis lin, ke se li serĉas respondojn, tiam Gagnrad (Odino) devus esti preta respondi siajn demandojn. Tamen, se iu el ili ne povus respondi iun demandon, tiu persono perdos sian kapon.
Vafthrudnir komencis demandi serion da demandoj al Odino, kaj tiam Odino demandis al li aron da demandoj. Tiu ludo de testo de saĝo ŝajnis malkaŝi malsamajn aspektojn de mitologio. Plejparto de la demandoj de Vafthrudnir rilatis al la nomoj de bestoj (ekz. ĉevaloj), geografio (nomoj de riveroj), kaj kie la fina batalo (Ragnarök) okazus.
La 18 demandoj de Odino etendiĝis de la Kreado ĝis Ragnarök. Plej interesaj estas la demandoj pri ambaŭ eventoj, precipe la homoj kaj dioj, kiuj supervivus Ragnarök.
Ŝajnis, ke Odino estis plej interesita pri la antaŭlasta respondo pri kiel li mortos. Vafthrudnir diris al li, ke Odino estos glutita de la lupo Fenrir, kaj ke li estos venĝita de Vidar, la filo de Odino.
Kun tiu respondo, Odino finis la ludon per la lasta nerespondebla demando, kiu estis –
«…kion Odino diris en la orelon de sia filo antaŭ ol li suriris la brulstakon?»
Vafthrudnir tiam rimarkis, ke tiu Gagnrad fakte estas Odino en alivesto, kaj konfesis, ke li ne scias, kion Odino flustris al Balder, la mortinta filo de Odino.
Do la poemo finiĝis. Kvankam Odino gajnis, ni ne scias, kio okazis al Vafthrudnir post la konkurso. Ĉu Vafthrudnir perdis sian kapon?
